Góðan daginn (kvöldið hjá mér)!
Enn og aftur er karlinn stabýll, neitar enn og aftur að fara út til að fylla tankinn af bjór í staðinn mun karlinn bara drekka kaffi (besta drykk heims) og lesa bók og leika sér að blogga hér í nokkrar mínútur.
Elli vinur minn stóð sig ekki vel í gær! Hann nefnilega át ekki allar moskítóflugurnar eins og hann er vanur að gera með stakri prýði þangað til nú, því þegar karlinn vaknaði í morgun var hann útbitinn af moskító og kannski eitt köngulóarbit líka með, frekar dapurt. Fyrir þá sem ekki vita er Elli eðlan sem er inni í hótelherberginu hjá mér hefur Elli staðið sig með prýði, og geri ég ráð fyrir að hann hafi verið orðinn pakksaddur um miðja nótt og ekki haft undan álaginu, önnur ástæða gæti verið að einhver Ella hafi komið í heimsókn til hans, þannig að eðlurnar hafi verið að eðla sig(!), en ég geri nú ráð fyrir að það hafi ekki verið svo, alla veganna vaknaði karlinn ekki við neinn hávaða!!!
Jæja, ég stakk alla veganna á köngulóarbitið og hitt er í rénun.
Golf og aftur golf var málið í dag, karlinn sló bara eins og herforingi enda voru 350 boltar farnir strikbeint eftir 4 tíma. Reyndar er ég með sár í höndunum eftir þetta, tek morgundeginum rólega. Þó er ég að fara í yfirferð á stutta spilinu í fyrramálið en ég læt það duga fyrir golfið á morgun nema maður detti enn einu sinni í pakkann. Karlinn hljóp svo 5km (var þreyttur og þ.a.l. ekki 8 km eins og venjulega) og skellti sér í "Get ready for this"-sturtu. Það er einstaklega góð formúla til að koma skapinu í gott lag og rífa upp stemmninguna svona fyrir sjálfan sig.
Það er nú kominn tími til að segja fólki hvernig það á að koma sér í gott skap á föstudegi eftir erfiðan dag! "Get ready for this"-sturtan er nefnilega alger snilld, hún felst í því að setja lagið "Get ready for this" með 2 Unlimited hljómsveitinni á fóninn og á replay. Um leið og lagið byrjar hoppar maður inn í klefann og skrúfar frá. Athuga skal að þetta er ekki hægt að gera í litlum sturtuklefa, verður að vera pláss fyrir 2 dansspor til hægri og vinstri. Svo þegar karlinn hrópar í laginu " get ready for this" og takturinn í laginu byrjar, þá snýr maður sér í hring (passa, það getur verið hált, passa ökklann!), ypptir öxlum og tekur 2 spor til vinstri, á meðan 2 spor til vinstri tekin þá fer sápan undir handakrikann vinstra megin. Svo hljómar aftur röddin og segir "Get ready for this" og ef maður þekkir lagið, um að gera að öskra með.
Þá er annar hringur tekin með sporum út að miðju, svo yfir til hægri með ypptum öxlum. Svo bæta menn við "move"-um eftir því sem við á. Þetta er gargandi snilld og mæli með þessu ef það er einhver blús í mönnum.
Hins vegar gerði ég massa mistök með "after shower" pakkann. Ég klikkaði nefnilega illa á því, ég er vanur að hafa "Living on a prayer" með Bon Jovi á fóninum meðan maður rakar sig, en breytti út af vananum og setti lagið "Nod your head" með Will Smith. Það gerði það að verkum að á meðan ég var að raka mig var ég alltaf að hreyfa höfuðið þannig að raksturinn fór út um þúfur, alltaf að skera mig eitthvað þannig að hálsinn á karlinum er eins og garðyrkju-grindverk (þessi grænu víruðu) á hálsinum! Best að breyta ekkert út af vananum aftur.
Jæja, karlinn er að taka því rólega í kvöld og andlegur undirbúningur hafinn fyrir simmann sem verður þ. 21. maí.
Karlinn fór ekki í Petronas towers í dag eins og planað var, en það er geymt fyrir morgundaginn, mér var nefnilega tjáð allt í einu í morgun að dagurinn í dag væri ekki góður fyrir heimsókn í Petronas. Já, bæjarferð eftir hádegi á morgun og karlinn spenntur. Kannski að maður verzli einhvern fjandann sem mann vantar ekkert í leiðinni. Kominn tími á að versla sér "fake" gallabuxur, hef ekki átt almennilegar gallabuxur lengi (spurning um hvort "fake"-buxur séu almennilegar!), enda kannski ekkert skrýtið vegna þéttleika. Já, karlinn var orðinn alger sekkur, en tímarnir breytast og mennirnir með.
Komið að lokum í bili, en munið "Get ready for this"-sturtuna, ef blús er í mönnum, þá virkar hún auk þess sem krydd í tilveruna á föstudögum (jafnvel öllum dögum) er bara snilld!
Lifið heil og heyrumst hress!!!
No comments:
Post a Comment